حوار: محمد صلاح
نجح براند DEEPA خلال الفترة الأخيرة في فرض نفسه بقوة داخل سوق الملابس الرياضية في مصر، بعدما أصبح واحدًا من أبرز البراندات المصرية في هذا المجال، بفضل الجمع بين الجودة والسعر المناسب، وهي المعادلة التي يبحث عنها المستهلك دائمًا.
ويقف خلف هذا النجاح العميد أمير حسن، صاحب البراند، الذي بدأ رحلته منذ سنوات طويلة في سوق الملابس الرياضية قبل أن يقرر إطلاق علامة تجارية مصرية خاصة به، نجحت في تكوين اسم قوي داخل السوق إلى جانب مصنع متخصص لإنتاج منتجات DEEPA.
وفي هذا الحوار، يكشف العميد أمير حسن لـ ” عربي نيوز” كواليس بداية المشروع، وأصعب التحديات التي واجهته، وخططه المستقبلية للبراند.
في البداية.. كيف جاءت فكرة تأسيس براند DEEPA؟
في البداية وأنا بمارس الرياضة، كان في منتجات كتير محتاجها ومكنتش بلاقيها بسهولة، وحتى لما كنت بلاقيها مكنتش بتكون مريحة بالشكل المطلوب، فبدأت أفكر: ليه منعملش منتجات بالشكل اللي احنا محتاجينه فعلًا؟
ولما بدأت أسأل عن الصناعة اكتشفت إن الموضوع مش سهل، ومينفعش أدخل في مجال الصناعة على طول من غير خبرة، فكان لازم أبدأ الأول من التجارة، وده خد وقت أكتر مما كنت متخيل.
كيف بدأت العمل في مجال الملابس الرياضية ومتى فكرت في إنشاء براند خاص بك؟
أنا شغال في مجال الملابس الرياضية من أكتر من 15 سنة، في البداية كنا شغالين زي السوق وبنقدم المنتجات الموجودة بشكل طبيعي، لكن مع الوقت كان عندي طموح إن يبقى عندنا براند مصري له شكل وتوجه خاص، ويقدر ينافس بقوة من غير ما يعتمد على تقليد البراندات العالمية. ومن هنا بدأت فكرة إنشاء براند مختلف يعبر عننا ويقدم منتج بجودة كويسة وسعر مناسب.
ما هي أصعب التحديات اللي واجهتك في البداية؟
من أصعب الحاجات إن الناس في البداية كانت مستغربة الفكرة، ومش متعودة تشوف براند مصري بالشكل ده، لكن مع الوقت بدأت تتقبل الموضوع.
كمان التصنيع عند الغير كان أزمة كبيرة جدًا، لأن الجودة مكنتش ثابتة، مرة الخامة كويسة ومرة لأ، وده كان بيمثل تحدي كبير بالنسبة لنا.
هل وجود مصنع خاص كان نقطة تحول؟
أكيد، علشان كده كان لازم يبقى عندنا مصنع خاص بينا، نتحكم من خلاله في الجودة والخامات والإنتاج.
المصنع كان من أهم أسباب نجاح DEEPA، لأنه خلانا نقدر ننفذ كل الأفكار اللي في دماغنا، ونوفر منتجات تناسب احتياجات السوق الرياضي.
ما هي الاستراتيجية التي اتبعتها من أجل التوسع ؟
اعتمدنا على التوسع بشكل تدريجي ومدروس، وركزنا الأول إننا نثبت نفسنا في السوق المصري ونبني اسم قوي يثق فيه العميل.
كيف ترى سوق الملابس الرياضية في مصر؟ وهل العميل يهتم بالسعر ولا الجودة؟
المستهلك المصري بيدور على المعادلة الصعبة: خامة كويسة بسعر مناسب، ودي نفس الحاجة اللي كنت بدور عليها وأنا صغير، وده اللي شغالين عليه حاليًا توفير خامات جيدة وجودة قوية بأقل سعر ممكن.
ما خطط DEEPA الفترة الجاية؟ وهل في نية للتوسع خارج مصر؟
أنا بفكر في استثمار طويل الأجل، مش فكرة مكسب سريع وخلاص، لازم الأول نثبت نفسنا أكتر في السوق المصري لأنه الأساس، وبعدها نفكر في الخارج. بالفعل جالنا عروض للتصدير بره مصر لكن رفضنا الفكرة حاليًا، ونعمل الآن بقوة على مشروع الفرنشايز
الفترة دي شغالين بقوة على مشروع فرنشايز DEEPA، وبنستهدف الناس اللي نفسها تبدأ في المجال لكن خايفة من المنافسة أو الخسارة، وبنساعدهم بخبرة البراند.
بعد هذا النجاح .. ما الحلم الأكبر الذي تسعى لتحقيقه ؟
بحلم إن DEEPA يبقى فيه 5000 عامل، وهبقى سعيد جدًا لما أقدر أوفر فرص عمل لعدد كبير بالشكل ده، وبحلم كمان إن البراند ينافس البراندات العالمية ويكسب ثقة العملاء بشكل أكبر.
ما هي رسالتك الأخيرة للشباب ؟
أنصح أي حد عايز يدخل مجال التجارة بالصبر والاستمرارية، لأن النجاح محتاج نفس طويل، اصبر، استمر، ومتوقفش، وهتوصل لحلمك إن شاء الله
وفي ختام حوارنا، نتوجه بالشكر إلى العميد أمير حسن على هذا الحوار المميز، والذي كشف من خلاله كواليس رحلة نجاح براند DEEPA وطموحاته الكبيرة خلال الفترة المقبلة. كما نتمنى له دوام النجاح والتوسع، وتحقيق المزيد من الإنجازات داخل سوق الملابس الرياضية المصري وخارجه، ليواصل تقديم نموذج ناجح لبراند مصري قادر على المنافسة بقوة.
