حوار: محمد صلاح
جرأة بلا حدود.. وصراحة من غير حسابات في عالم كرة القدم، قليلون من يملكون الجرأة للحديث بلا قيود، لكن الكابتن رضا عبدالعال يظل واحدًا من أبرز هؤلاء. لاعب سابق ومحلل لا يعرف المجاملة، اشتهر بآرائه الصريحة التي دائمًا ما تثير الجدل، لكنها في الوقت نفسه تعكس رؤية فنية مختلفة.
في هذا الحوار الخاص لموقع ” عربي نيوز “، يتحدث عبدالعال عن كواليس وأزمات داخل منتخب مصر، وينتقد اختيارات الجهاز الفني بقيادة حسام حسن، كما يكشف موقفه النهائي من العودة للتدريب بعد أزمته الصحية، ولا يتردد في تحميل الإدارة مسؤولية ما يحدث داخل الأهلي، مؤكدًا أن الصراحة كانت وما زالت سر نجاحه الحقيقي.
هل ترى أن صراحتك كانت سبب نجاحك أم أزماتك؟
والله أنا شايف إنها سبب نجاحي، الواحد بيقول الحق والناس بقالها فترة مفتقدة الكلام ده، وأنا شايف إنها سبب نجاحي مش أزماتي.
ما القرار الذي غيّر مسار حياتك؟
في قرارات كتير، بس يمكن أكتر قرار غير مسار حياتي لما اخترت أشتغل في مجال التحليل، والفضل يرجع بعد ربنا للكابتن خالد الغندور.
هل يمكن أن نراك مديرًا فنيًا من جديد؟
بعد العملية الأخيرة اللي عملتها بقى صعب جدًا أرجع لمجال التدريب، وكمان الصحة مبقتش زي الأول، ولو اتعرض عليّ أي فريق مبقاش ينفع خلاص، اعتزلت التدريب والموضوع انتهى.
ماذا لو عُرض عليك تدريب الأهلي؟
مش هينفع، القرار انتهى بالنسبة لي، والتدريب خارج حساباتي.
تقييمك لأداء منتخب مصر الفترة الأخيرة.. هل في أزمة حقيقية في مركز معين داخل المنتخب؟
في أزمات كتير، بس إحنا هنفضل نساند لغاية ما نشوف الدنيا هتوصل لفين، إنما الاختيارات وطريقة اللعب مش عاجباني، كابتن حسام بياخد لاعيبة كتير مش بيلعبها سواء مهاجمين أو غيره، وكمان في لاعيبة كتير لم تنضم للمنتخب أحسن من اللاعيبة المنضمة للقائمة، وهتفرق معاك كتير في الأداء والإيجابية على المرمى، بس هو ليه وجهة نظر معينة وإحنا وراه لحد ما يغيرها يا إما يمشي.
توقعك لمباراة مصر وإسبانيا بصراحة.. هل منتخب مصر يقدر يصمد قدام منتخب زي إسبانيا؟
مش مهم النتيجة، بس نجرّأ اللاعيبة تلعب كورة، لأننا رايحين كأس عالم مش أمم أفريقيا، ولو تفتكر أمم أفريقيا الأخيرة إننا كنا بندافع قدام بنين ولعبنا وقت إضافي، وده يدل إننا مبنلعبش كورة، وأنا عايز اللاعيبة تلعب كورة لأننا بنلاعب الفريق المصنف الأول عالميًا، وأنا أتمنى اللاعيبة تكسر حاجز الخوف وتقدم مباراة عالمية النهارده، وإن شاء الله بالتوفيق.
هل خروج الأهلي من إفريقيا “فشل إداري” ولا “سقوط فني”، ومين يتحمل المسؤولية الأكبر.. المدرب ولا اللاعبين ولا الإدارة؟
فشل إداري، فشل فني إزاي وأنت جايب 3 مدربين ومشيتهم: كولر وريبيرو وجايب توروب، فده يدل على فشل الإدارة بشكل صريح. لاعيبة مين اللي جايبها مدرب؟ طب مين اللي جايبه؟ أوضة اللبس باظت ليه؟ لاعيبتك بترحل عن النادي ليه؟ ولاد النادي بقت بترحل عن النادي ليه؟ ليه مبقاش في لاعيبة بتجدد؟ ومنهم رامي ربيعة، رمضان صبحي، أكرم توفيق، عبد المنعم، حمزة علاء اللي موفقش ورجع تاني. لازم نحط علامات استفهام: ليه لما عقود اللاعيبة بتخلص مبتجددش؟ وكمان ليه مشيت هاني رمزي وجبت محمد رمضان؟ والناس بتطلع تتكلم، الإدارة مش واخدة بالها من الكلام ده ولا إيه؟ وأنا بقولها صريحة: الكابتن محمود الخطيب هو يتحمل مسؤولية الفشل الإداري ده، والدليل إنه ساب الموضوع للأستاذ ياسين منصور وكابتن سيد عبد الحفيظ.
من وجهة نظرك.. من سيحسم لقب الدوري؟
التحكيم هو اللي هيحسم بطولة الدوري.
لو معك قرار واحد لتغيير شكل الكرة المصرية.. ماذا ستفعل؟
هجيب الناس اللي لعبت كورة وأحطها في المكان الصح، سواء رئيس اتحاد الكورة، إنما اللي ماسكين دلوقتي كلهم ملعبوش كورة، وهما اللي متحكمين في كل حاجة وضيعوا شكل البطولات والدوريات وبطولات الجمهوريات للناشئين، لازم كل دول يتغيروا ونجيب ناس لاعيبة كورة بس، ويتعملهم رواتب علشان محدش يبص بره.
