تصدرت الفنانة منى زكي تريند جوجل، وأصبحت حديث السوشيال ميديا، بعد تصريحاتها خلال ندورة في مهرجان مراكش قبل عرض فيلم الست هناك لأول مرة عالمًيا، بينما من المقرر في مصر 10 ديسمبر المقبل.

كواليس التحضير للشخصية والصعوبات التي واجهتها

كشفت الفنانة منى زكي، كواليس التحضير لشخصية أم كلثوم والصعوبات التي واجهتها، وقالت: “كنت بحاول أركز على أحاسيس كل مرحلة في المراحل العمرية لأم كلثوم، وكنت حاسة أن هي اللي هطلع الشخصية بشكل كويس، مش إني أقلد الشخصية، وكنت باخد تدربيات وإلقاء على إني اتكلم بصوت مش بتاعي، وبطبقة مختلفة في جميع المراحل العمرية لأم كلثوم، لأن كل ما بنكبر صوتنا بيتغير، وكنت باخد دروس في التمثيل، والمشاعر، وخلال السنة والـ 3 شهور، كنت بيجي عليا أوقات أحس إني محبطة، وإني مش بوصل لحاجة وكنت بقول لمروان حامد أنا آسفة مش هقدر أكمل، بيقولي هي خطوات صغيرة ومع الوقت الموضوع هيختلف”.

وأكدت أنه لولا وجود مروان حامد لم تكن ستقبل تقديم الدور: “لولا وجوده مكنتش هقبل الدور لأني عارفة قوته، وعارفة إنه متقدم أوي وعارف كل حاجة في السينما ومتطور حقيقي بشكل عالمي، وأول حاجة شجعتني الخطة اللي قالهالي، ولما قرأت الاسكربت شجعني أخوض التجربة”.

وعن أكثر الصعوبات التي واجهتها قالت: “كنت بقعد ست ساعات على كرسي الماكياج قبل التصوير ممنوع أشرب مياه أو ألف، لأن كان ممكن الماكياج يبوظ كل حاجة ونعيد من الأول وكان تحدي كبير بالنسبة لي، بجانب إن كان فيه تلاتة بيلبسوني في نفس الوقت وأنا مبحبش حد يلمسني، فكانت صعوبات نفسية وصعب أتخطاها، بجانب إني أقعد عدد الساعات دي من غير ما اتحرك وبعدها أقدم مشاعر”.

أما عن التشابة بينها وبين أم كلثوم، قالت: “مفيش صفات قريبة غير وأنا بقدمها في الأربعينات، لأني أنا كمان في الأربعينات، لكن شخصية أم كلثوم ثرية جدا وعاشت أكتر من حقبة، وكان فيه صعوبات كتير في طريقة الكلام والإلقاء والصوت في الحوار كان محتاج نشتغل عليه وقعدنا سنة وتلات شهور نشتغل عليه”.