يفتح الكابتن محمد رزق لاعب الأهلي السابق قلبه، كاشفًا كواليس لا تُحكى لأول مرة عن رحلته داخل القلعة الحمراء، من لحظة تحقيق الحلم في أول يوم له بالأهلي، إلى أصعب الاختبارات النفسية والفنية التي مرّ بها داخل الملعب وخارجه.
وتحدث رزق في حوار خاص لموقع ” عربي نيوز “، بجرأة عن أزمة التجنيد التي غيّرت مسار مسيرته، وضغوط اللعب تحت شعار الأهلي، ودور المجاملات في اختيارات التشكيل، كما يوجّه انتقادات مباشرة لحال الكرة المصرية، مؤكدًا أنها ابتعدت عن الجماهير واقتربت أكثر من عالم المصالح والبيزنس، في حوار صريح مليء بالاعترافات والآراء الجريئة.
كيف يتذكر محمد رزق أول يوم له داخل النادي الأهلي؟
طبعًا كان أفضل يوم في حياتي، وسعادة ما بعدها سعادة. كان فيه شوية توتر وقلق طبيعيين، لكن اللاعبين الكبار كانوا سبب في تأقلمي السريع، وخلّوني أحس بالراحة من أول لحظة، ومن غير أي خوف أو قلق.
ما أصعب لحظة واجهتك بقميص الأهلي ولم يعرفها الجمهور؟
أصعب لحظتين كانوا مختلفتين. الأولى ركلة الجزاء، لأنها كانت أول مباراة لي مع الفريق وأول اختبار حقيقي قدام الناس.
واللحظة التانية لما عرفت إني هخرج إعارة بسبب التجنيد، ووقتها محدش كان عارف السبب، ومكنتش قادر أتكلم أو أوضح أي حاجة.
أي بطولة مع الأهلي لها مكانة خاصة في قلبك ولماذا؟
بطولة السوبر طبعًا، لأنها كانت أول مباراة، وأول ركلة جزاء، وأول بطولة في مشواري. كمان كانت سبب في تجمع المنتخب وقتها، فأكيد يوم مميز ومش ممكن أنساه.
كيف ترى مستوى الكرة المصرية مقارنة بفترة لعبك؟
للأسف الكرة المصرية ماشية في طريق مش كويس خالص. زمان كانت أهميتها في الجمهور والمتعة، دلوقتي بقت استثمار ومصالح وبيزنس وبيدچات، وحاجات عمرنا ما كنا بنفكر فيها بالشكل ده.
ما أكبر أزمة تواجه اللاعب المصري حاليًا؟
عقلية اللاعب، وكمان الإعلام والبيدچات اللي ممكن توديه لطريق بعيد عن الكرة، خصوصًا لما يعتمد على مساندتهم حتى لو هو غلط.
من لاعب حالي في الأهلي ترى فيه امتدادًا لأسلوبك داخل الملعب؟
إمام عاشور، وكمان عمرو السولية قبل كده.
هل يتعرض لاعبو الأهلي لضغط إعلامي أكبر من أي نادٍ آخر؟
طبعًا، لاعبي الأهلي الضغط عليهم أكبر بسبب الجمهور الكبير والمسؤولية، ومتطلبات الإدارة اللي دايمًا بتجمع بين البطولات والأداء القوي.
هل ظلمك الأهلي في مرحلة ما خلال مسيرتك؟
أكيد اتظلمت، لكن مش من النادي نفسه. الظلم كان من أشخاص كان ممكن يساعدوني في أزمة التجنيد أو على الأقل يساندوني للخروج منها بأقل خسائر. بسببهم اتبهدلت وخسرت طموحات كتير وحاجات مهمة في مشواري.
من المدرب الذي أخرج أفضل ما لدى محمد رزق؟
من استطاع أن يخرج أفضل ما لدي هو الكابتن محمد رضوان، ومستر جاريدو، والكابتن أحمد سامي.
وهل هناك مدرب لم يمنحك الفرصة الكافية؟
بعد الأهلي، كان فيه مدربين بيحاولوا يبعدوني عشان يفرضوا شخصيتهم قدام باقي اللاعبين، لكن الحمد لله مجهودي وأدواري داخل الملعب كانت دايمًا بتفرض وجودي، حتى لو غصب عنهم.
هل كان الالتزام الزائد سلاحًا في صالحك أم ضدك؟
قال رزق أنه أوقات كثيرة كان التزامي في مجال الكرة تسبب لي في مشاكل كتير، وكان في أوقات سلاح ضدي مش لصالحي.
بصراحة… هل المجاملة تلعب دورًا في اختيار التشكيل داخل الأندية الكبيرة؟
أوقات كتير المجاملات والمصالح الشخصية بتدير أماكن كبيرة، وبتدي ناس حقوق مش من حقها.
